Gilas daog vs Iran
CEBU, Philippines - Bisan pa og wala nila makuha ang kampiyonato sa 39th William Jones Cup, ang batan-ong Gilas Pilipinas mihimo gihapon og nindot nga kampaniya diin gitapos nila kini sa usa ka 90-82 nga kadaugan batok sa karibal nga Iran kagabii didto sa Taipei Heping Gymnasium.
Ang Gilas mihuman sa torneyo dala ang 6-3 win-loss record diin mipwesto sila sa ikaupat nga dapit sunod sa Canada, Lithuania ug South Korea.
Si Gilas coach Chot Reyes nalipay sa nabuhat sa Gilas nga gibidahan sa mga PBA rookies ug amateur standout. Ang Jones Cup maoy katapusang preparasyon sa national team nga bahinon tungod sa duha ka dagkong torneyo nga ilang salmutan sunod buwan nga mao ang FIBA Asia Cup sa Lebanon ug Southeast Asian Games sa Malaysia.
Batok sa mas tag-as nga mga Iranian, ang import nga si Mike Myers midiga og 21 puntos, samtang ang sinaligang local scorer sa national team nga si Matthew Wright miiskor og 20 puntos, samtang ang Fil-German nga si Chris Standhardinger ug Cebuano shooter nga si RR Pogoy nagkumboya og 22 puntos.
Gigamit sa Gilas ang ilang kapaspas aron libugon ang depensa sa Iran. Milabaw sila og otso puntos sa first half, 50-42, apan miaksyon og gukod ang mga Iranian nga minaog sa labaw ngadto sa tres puntos 54-51 sa sayung bahin sa third period.
Wala maratol ang national team ug padayun ilang atake sa fastbreak sa pagpangulo ni Standhardinger diin nakuha nila ang 79-66 nga labaw sa katapusang 6:57 sa duwa.
Subling mi-rally ang mga Iranian aron inaog sa onse ang labaw sa Gilas, 75-86, apan gisugat sila og rally sa mga Pinoy cager nga hingpit nga mikandado sa daog. (BANAT NEWS)
- Latest
