Regeneration solo lider na sa ICBL Season 3
CEBU, Philippines - Nagmangtas og maayo si Emeben Ageas, kinsa mipatuasik og 28 puntos sa Regeneration nga milubong sa CCBC, 78-62 sa senemanang Inter-Christian Basketball League (ICBL) Season 3 niadtong Domingo sa gabii didto sa San Vicente gym sa Yati, Lilo-an.
Ang Regeneration ni Gamaliel Ermac temporaryong nagsolo sa liderato bitbit ang 4-1 nga baraha.
Dako sab og natampo sa kadaugan silang Bogz Gonzales ug Reymund Arena nga mitimang og 15 puntos matag usa. Si Franie Suson mitikdol og 10 puntos sa Regeneration nga nakarekober sa second period aron molansang og 43-32 sa halftime.
Nangamay na ang kadaogan sa Regeneration dihang milansang sila og 65-39 nga labaw sa fourth quarter.
Ang CCBC ni Pastor Fel Singuran gipangulohan sab nilang Darryl Daño ug Eman Singuran nga parehong miantog og 15 puntos.
Abante unta ang CCBC paghuman sa first period, 21-16, apan takulahaw lang naguba ang ilang duwa sa sunod nga kuwarter hinungdan nga nahilis ang labaw ug wala na kini makarekober pa.
Sa laing bahin, gidungog na gyud ang mga pag-ampo sa Gideons BBC ni Pastor Lando Espinosa ug sa Jemme’s Enterprises & Hauling Services ni Joel Mercadal dihang nagrasyahan na sila sa labing una nilang daog batok sa ilang tagsa-tagsa ka kaatbang.
Ang Gideons mipilde sa Marianne’s Bakeshop ni Messael Mercadal sa iskor nga 51-43, samtang ang Jemme’s Enterprises wala sa’y kukaluoy nga midemolis sa CHBC ni Pastor Lemuel Morata, 55-33.
Gumikan niini, ang upat nag-uban sa kinailawmang bahin sa standing uban sa Reunited sa managsamang 1-3 nga baraha ning maong torneyo nga ubos sa superbisyon ni league commissioner Ernie Sibonga sa abag nilang John Irving Sibonga ug Junjun Nelmida.
Si Gonzaga miburak og 16 puntos aron pangulohan ang Gideons, samtang si Toledo mao sab ang nangulo sa Marianne’s Bakeshop nga mikabkab og 13 puntos.
Sa laing bahin, sila si Welmark Villarosa ug Lloyd Samson mikabkab og 13 puntos matag usa aron pangulohan ang balanseng opensa sa Jemme’s Enterprises nga maoy nidiktar sa kinatibuk-ang duwa.
Puntos Matag Usa
Unang duwa:
Gideons (51) – Gonzaga 16, Alburo 9, Rahn 7, Espinosa 6, Enriquez 5, Trangia 4, Faith 2, Ynot 2.
Marianne’s Bakeshop (43) – Toledo 13, Mercado 9, Estrera 6, Genares 5, Mercadal 2, R. Genares 2, Noname 2.
Ikaduhang duwa:
Jemme’s Ent. (55) – Villarosa 13, Samson 13, Laoc 9, Arañas 6, Mercadal 4, Rabe 2, Valiente 2, Mercadal 2, Judilla 2, Arsenal 2.
CHBC (33) – Gonzaga 9, Abatayo 6, Maglasang 5, Pelin 4, Mendaros 3, Soreño 3, Reyes 3, Mendaros 2.
Ikatulong duwa:
Regeneration (78) – Ageas 28, Gonzales 15, Arena 15, Suson 10, Ascarez 6, Evardo 3, Castro 1.
CCBC (62) – Daño 15, E. Singuran 15, Povadora 6, Jer. Singuran 5, Lutao 4, Cabahug 4, JL Gerra 4, Jo. Singuran 2, W. Gerra 2. (BANAT NEWS)
- Latest