Misyon ni Pacquiao

CEBU, Philippines - Si Hall of Fame trainer Freddie Roach dunay tahas nga ipabuhat ni Manny Pacquiao.

Kinahanglan niyang pildihon sa Jeff Horn sa impresibong paagi aron pahayagan ang posibilidad sa gihandom nilang rematch ni Floyd Mayweather Jr. nga gitinguha na sab karon  ni Pacquiao.

Matud pa ni Roach nga si Horn nagbarog karon nga tunok sa ilang dalan mao nang kinahanglan nga dispatsahon ni Pacquiao ang Australyano sa giatngan nilang sangka karong Domingo (oras dinhi sa Pilipinas) didto sa Suncorp Stadium sa  Brisbane, Australia.

Sa gikatakdang  12 ka hugna nga sangka, si Pacquiao modepensa sa iyang WBO welterweight title.

Alang ni Roach, wala na’y ugma nga nagpaabot ni Pacquiao kon ugaling masugamak kini sa mga kamot ni Horn.

“Manny’s in a must-win situation. He wants a rematch with Mayweather. To get Mayweather he must look good against Jeff Horn. He has to look good, he has to be impressive,” matud pa ni Roach sigun sa taho a boxingnewsonline.net.

Masaligon hinuon si Roach sa ilang tsansa ilabi na kay maayo ang dagan sa ilang training camp diin si Pacquiao nakaiskor og duha ka knockdowns, butang nga taud-taud nang wala mabuhat sa iyang boksingero.

Gumikan niini, gipanglantawan ni Roach nga usa ka eksplosibong Pacquiao ang makigsinukliay og kumo ni Horn karong Domingo.

Sa iyang bahin, mismo si Pacquiao ang mipadayag sa iyang interes nga harungon og balik si Mayweather nga mipilde kaniya pinaagi sa desisyon atol sa “Fight of the Century” niadtong Mayo 2014.

Apan nagkanayon si Pacquiao nga unahon una niya og atiman ang iyang tahas batok ni Horn ilabi na kay wala pa man kini mahuman. (BANAT NEWS)