Westbrook maoy MVP

CEBU, Philippines - Misalir ang pagkulit ni Russell Westbrook sa Oklahoma City Thunder og rekord nga 42 ka ‘triple-doubles’ sa miaging season human pormal siya nga gibayaw isip NBA Most Valuable Player kagahapon didto sa New York.

Si Westbrook nakig-uban na ni Oscar Robertson isip mao lamang ang duha ka players sa kasaysayan sa liga nga mi-average og triple-double tibuok season.

Gawas niini, iya sab nga gibuak ang karaang rekord ni Robertson nga 41 ka triple-doubles niadtong 1961-1962 season.

Gipukan ni Westbrook alang sa maong mahinungdanong pasidungog silang  James Harden sa Houston Rockets ug Kawhi Leonard sa San Antonio Spurs aron paghulip sa trono ni Stephen Curry  nga maoy naghari isip MVP sa miaging duha ka tuig.

Sa sayo pa, si Malcolm Brogdon sa Milwaukee Bucks mihimo og kasaysayan isip labing unang player nga wala makuha sa first round sa NBA Draft nga midaog sa “Rookie of the Year”  award.

Samtang ang teammate  ni  Brogdon nga si Giannis Antetokounmpo maoy gipasidunggan nga “Most Improved Player”.

Si Mike D’Antoni sa Houston mibira sa ikaduha niyang “Coach of the Year” award ug ang iyang player nga si Eric Gordon maoy “Sixth Man of the Year”.

Lain pang mga midaog og awards mao sila si Draymond Green sa Golden State Warriors (Defensive Player of the Year), Kemba Walker sa  Charlotte Hornets (Sportsmanship Award),  Dirk Nowitzki sa Dallas Mavericks (Teammate of the Year) ug Isaiah Thomas sa Boston Celtics (NBA Cares Community Assist Award).

Naglangkob sa All-Rookie Team mao sila si Brogdon, Dario Saric ug Joel Embiid sa Philadelphia Sixers, Buddy Hield sa Sacramento Kings ug Willy Hernangomez sa New York Knicks.

Uban nilang Green ug Leonard sa All-Defensive Team sila si Rudy Gobert sa Utah Jazz, Chris Paul sa LA Clippers ug Patrick Beverly sa Houston.

Samtang si Bill Russell gihatagan sa NBA og Lifetime Achievement Award gumikan sa iyang natampo alang sa kalamboan  sa liga. (BANAT NEWS)