Aulga vs. AMBL sa Golden 50’s Finals
CEBU, Philippines - Bisan nakabaton og ‘twice-to-beat’ advantage, ang Aulga Hardware ug ang AMBL/Power Forty wala gihapon mokompiyansa ug ilang gipanglubong ang tagsa-tagsa nilang kaatbang aron maoy mag-abot sa finals sa Guadalupe Golden 50s basketball tournament.
Ang Aulga Hardware midaog sa Trangia/McMill sa iskor nga 108-83, samtang ang AMBL/Power Forty mipilde sa Pardo Builders, 82-68 sa semifinals niadtong Domingo sa hapon didto sa Pardo Sports Complex.
Si Toto Lawas mihakot og 18 puntos aron mangulo sa tanang scorers sa Aulga Hardware nga wala gyud molingi human moposte og 35-27 nga bentaha sa first period.
Mipakita sab og maayong salida ang team owner nga si Raul Aulga nga miariya og 12 puntos, nga mao sab ang natampo nga iskor nilang Gaga Cabanilla ug Roy Galon, samtang si Bing Diola mihipos og 11 puntos.
Nakawang lang ang 27 puntos ni Dodong Elizalde kay dili kini igo aron iyang mahatod ang Trangia/McMill ngadto sa kampiyonato.
Si Alex Abano miamot og 24 puntos ug si Danny dela Peña mitampo’g 19 puntos sa napilding koponan.
Sa laing bahin, si Gogo Fuentes mipabuto og 22 puntos sa AMBL/Power Forty nga milusad og
makalisang nga ataki sa second quarter nga maoy gihimo nilang hinagiban paglumpag sa Pardo Builders. Si Michael Arias mitimbre og 12 puntos, samtang sila si Teody Ebrado ug Cabatas nagtampohay og 10 puntos.
Ang natagak nga Pardo Builders gipangulohan nilang Opong Zafra ug Atan Diaz nga nagkumboya’g 37 puntos.
Ang finals gikatakda karong Hulyo 9 diha sa Guadalupe Sports Complex.
Ang duwa sugdan sa alas-8 sa buntag diin magbangga alang sa ikatulong puwesto ang Trangia/McMill ug Pardo Builders, sundan dayon sa duwa sa Aulga Hardware ug Pardo Builders.
Ang liga namugna pinaagi sa mga paningkamot ni Serge Cortes inabagan sa magpapatigayon nga si Raul Sollano.
Puntos matag usa
Unang duwa:
Aulga Hardware (108) – Lawas 18, Aulga 12, Cabanilla 12, Galon 12, Diola 11, Jacaban 8, Miñoza 7, Bual 7, Posadas 7, Cortes 6, Bardina 5, Bihag 3.
Trangia/McMill (83) – Elizalde 27, Abano 24, Dela Peña 19, Ylaya 9, Commendador 4.
Ikaduhang duwa:
AMBL/Power Forty (82) – Fuentes 22, Arias 12, Ebrado 10, Cabatas 10, Lim 9, Rama 7, Labalan 6, Abasolo 3, Cantarona 3.
Pardo Builders (68) – Zafra 19, Diaz 18, Rosito 6, Lim 6, Abbu 5, Abella 4, Solatorio 4, Belande 2, Espinosa 2, Castro 1, Villarta 1. (BANAT NEWS)
- Latest
