Lancers eksplosibo, Panthers ‘sugamak
BAYUGAN CITY, Agusan del Sur, Philippines – Managlahi nga kasinatian ang nahiaguman sa University of the Visayas Green Lancers ug University of Southern Philippines Foundation Panthers pagsugod sa 2nd Mayor Kim Lope A. Asis Collegiate Basketball Invitational Tournament dinhi sa Lope Asis Memorial Gymnasium kagahapon.
Ang Lancers milusad og eksplosibong ataki sa sayong bahin sa duwa aron paglampurnas sa Emilio Aguinaldo College (EAC) Generals, 95-74, samtang ang Panthers nahagba sa mga kamot sa Xavier University-Ateneo de Cagayan Crusaders, 100-93.
Ang Generals igo lamang nakasikit sa iskor nga 4-5 gumikan kay ang Lancers mipabuto og 25-4 nga bomba aron pagbuak sa duwa, 30-8 sa oras nga 7:52 sa second period.
Dili na malalis ang resulta sa duwa human ang Lancers miposte og 29 puntos nga labaw duha sa nahibilin nga 4:53 sa ikatulong kuwarter.
Si Tristan Albina maoy nangu sa Lancers uban sa iyang 15 puntos, samtang sila si Josue Segumpan, Rey Suerte ug Gileant Delator mihipos og 10 puntos matag usa.
Sukwahi sa Lancers, bugnaw ang sinugdanan sa Panthers hinungdan nga nalubong sila og 13 puntos sa nanghinapos nga bahin sa unang kuwarter.
Ang Panthers na hinuon maoy naglabaw sa halftime, 47-44, apan miratsada na sab ang Xavier U aron pag-abante sa iskor nga 76-70 human sa tulo ka kuwarter.
Ang Crusaders na maoy mikontrolar sa duwa sukad niadto.
Alkansi og tres puntos sa nahibilin nga usa ka minuto sa duwa, 92-95, ang Panthers duna unta’y tsansa nga makatabla, apan si Lyndon Colina igo lang nakapasulod og usa sa tulo niya ka free throws.
Si Mark Labares nga kanhi sakop sa USJ-R Jaguars, milansang dayon og upat ka sagunson nga free throws sa wala pa si LJ Aquino mipasulod og usa ka free throw aron pagsilyo sa daog sa Crusaders.
Si Aquino maoy mipatay sa Panthers human miratsada og 28 puntos ug ingon man si John Rey Manatad nga mikadlit og 23 puntos sa Crusaders.
Si Lugie Cuyos maoy nangu sa Panthers uban sa iyang 16 puntos, apan ang ilang 6-foot-8
Nigerian import nga si Ritchie Managor miiskor lang og 12 puntos. (BANAT NEWS)
- Latest