Gov. Cup north finals: Consolacion gipakuratan ang Mandaue

CEBU, Philippines – Gipakuratan sa Consolacion Sarok Weavers ang kanhi way pildeng Mandaue City, 84-78, aron pagdanak sa unang dugo sa best-of-three North Division finals sa 2017 Cebu Governor's Cup Under-21 Inter-Cities and Municipalities Basketball Tournament niadtong Sabado sa gabii didto sa Mandaue City Sports and Cultural Complex.

Mahimo nang langkaton sa Sarok Weavers ang korona ko ugaling usban nila og parot ang Mandaue ug way lain mao kini ang ilang tuyo ilabi na kay sila man maoy mo-host sa Game 2 karong alas-7 sa gabii didto sa Consolacion Sports Complex.

Eksplosibo ang gipakitang duwa nilang JB Damolo ug Alje Mendez sa Mandaue apan nawani sila sa kainit ni JC Escalona nga maoy miduslit sa nagbagang rally sa Consolacion.

Og dugang pahimus sa daghang sipyat sa Mandaue, ang Sarok Weavers mikontrolar sa duwa human sila milabaw og 11 puntos, 41-30, sa nahibilin nga 2:36 sa ikaduhang kuwarter.

Nakasikit hinoon ang Mandaue ngadto na lang sa sayes puntos sa halftime, 37-43, gumikan sa paningkamot ni Ken Gato.

Hinayhinay nga migukod ang Mandaue hangtud nga nakatabla kini, 57-57, human sa ikatulong kuwarter apan sila si Emmanuel Villamor ug Cyril Sabellana misalbar sa Consolacion pinaagi sa pagkumboya og 19 puntos sa mainit nilang ratsada sa katapusang hunat sa duwa nga maoy nahimo nilang taytayan sa kalampusan.

Wala sab magpabitin si Vincent Lequin sa Consolacion diin ang krusyal niyang duha ka sunod-sunod nga tirada sa hilimatyong oras nga nahabilin maoy nakapawong sa paglaum sa Mandaue nga makabangon.

Si Villamor maoy naghatag og kahayag sa Consolacion uban sa iyang 25 puntos ug gisundan kini ni Escalona nga dunay 21 puntos, Sabellana uban sa iyang 18 puntos ug ni Patrick Montaño nga mihipos og 10 puntos.

Nangulo sa Mandaue mao si Froilan Mangubat uban sa iyang 18 puntos, samtang sila si Damolo ug Mendez nagkumboya og 32 puntos. Si Gato mi-iskor og 13 ug si Christopher Isabelo mipupo og 10 puntos apan silang tanan naminghoy gumikan kay  nakatilaw og pilde sa labing unang higayon human mikulit og 10-0 record. (EBV) (BANAT NEWS)