Pacquiao mitaak na sa Australia
CEBU, Philippines – Mitaak na si Pinoy ring star Manny Pacquiao didto sa Australia alang sa gi-atngan niyang away batok ni Jeff Horn diin siya modepensa sa iyang WBO welterweight title karong Hulyo 2 didto sa Suncorp Stadium sa Brisbane.
Gawas sa iyang kapikas nga si Jinkee, mikuyog uban sa 38-anyos nga si Pacquiao mao ang iyang trainer nga si Freddie Roach, conditioning coach Justin Fortune, sparring partner George Kambosos Jr. ug ubang miyembro sa iyang grupo nga miabot ngadto sa 160 ka buok.
Sa iyang pag-abot, gipadayag dayon ni Pacquiao ang iyang kaandam nga makighilam-osay og kumo ni Horn. Gibati sab siya og tumang kahinam nga mowadwad sa iyang abilidad sa labing unang higayon didto sa Australia.
“Training is good, we did a lot of hard work, I am very excited for the fans to give a good show to show my best and in boxing ring,” matud pa ni Pacquiao sa dihang nahinabi sa Australian Broadcasting Corp. radio.
“Some reports coming out of the Philippines that I haven’t been training hard are not true. It just happens that when some of our friends came around to our training camp, we weren’t doing much and people assumed I wasn’t training hard,” dugang pa ni Pacquiao.
Sa iyang bahin, si Roach, nga naka-train sab og pipila ka mga world champions sama nilang Mike Tyson, Oscar De La Hoya ug Wladimir Klitschko, nagkanayon nga way laing tuyo si Pacquiao kondili ang madepensaan niini ang iyang bakos.
Inilog man tuod ang iyang boksingero ug pagdaog maoy ilang tumong apan si Roach miingon nga bisan gamay dili sila mokompiyansa ni Horn.
“We are here to win the fight, we don’t take anyone lightly,” padayag pa ni Roach.
Si Pacquiao, nga usa ka eight-division world champion, dunay 59-6-2 record uban ang 38KOs, samtang si Horn wa pay pilde sa 17 ka away apan usa niini tabla. (BANAT NEWS)
- Latest