Minglanilla Jail ibalhin ug padak-an

CEBU, Philippines - Giplanohan karon sa lokal nga kagamhanan sa Lungsod sa Minglanilla nga ibalhin ug padak-an ang ilang prisohan.

Naglaraw si Minglanilla Mayor Elanito Peña nga iyang ibalhin ug padak-an ang prisohan sa ilang lungsod human iyang naobserbahan nga nagkadaghan na ang ilang populasyon ug daghan na sab ang napriso.

Kahinumduman nga ang warden sa Minglanilla Municipal Jail nga si JInsp. Russel Rataya niingon nga naghuot na gyud ang ilang mga priso tungod sa padayon nga operasyon sa mga otoridad batok sa mga tawo nga nalambigit sa ginadiling drugas.

 Ang kasamtangang prisohan sa Minglanilla aduna la’y sin nga koral kay temporaryo pa man kini. Nunot niini, ang mayor nagkanayon nga iyang ibalhin ngadto sa Brgy. Cadulawan ang prisohan gikan sa Brgy. Tulay. Ang yuta nga giandam alang niini aduna’y gidak-on nga moabot sa 5 ka ektarya.

 Asoy pa niya nga ang yuta gipanag-iya sa kagamhanan samtang aduna nay budget ang Bureau of Jail Management and Penology sa pagtukod sa edipisyo.

 Gitataw ni Peña nga iyang pun-an ang budget ilabi na nga aduna man sila’y itukod tapad sa maong building nga holding center alang sa mga menor de edad nga makabuhat og krimen. Dili pa hinuon siya makatug-an kon pila ang budget alang sa maong katuyuan. (BANAT NEWS)