Bakwit gikan Marawi nagpatabang sa Lapu-Lapu

CEBU, Philippines - Nangayo karon og tabang ang 33 ka mga bakwit gikan sa Dakbayan sa Marawi nga anaa karon sa Barangay Pajo sa Dakbayan sa Lapu-Lapu.

Gipahibawo ni Pajo Barangay Kapitan Jonard Ahong Chan pinaagi sa iyang post sa Facebook nga adunay mga bakwit sa ilang lugar nga gikan sa Marawi City ug nangayo siya og panabang ngadto sa publiko alang sa paghatag og donasyon ngadto kanila.

Matud ni  Kapitan  Chan nga tapot sa lawas lang ang gisul-ob sa maong mga bakwit atol sa ilang pagbiya didto sa Marawi nga maoy hinungdan nga nangayo siya sa katawhan og hinabang sama sa used clothing, mga hygiene kit, pagkaon ug uban pa.

Gipadangat na hinuon ni Chan ang panginahanglan sa maong mga bakwit ngadto kang Mayor Paz Radaza kinsa mihimo na usab og mga lakang sa pagtabang kanila.

Sa nasayran, nidangop kang Chan ang maong mga bakwit nga kasamtangan karong nagpuyo sa ilang mosque nga anaa mahimutang sa Sitio Humay-Humay sa Barangay Pajo.

Si PSSupt. Rommel Cabagnot, ang direktor sa Lapu-Lapu City Police Office nga nakadawat sa maong kasayuran, naghimo na usab og mga lakang sa pagsusi sa pagkatawo sa maong mga bakwit. (BANAT NEWS)