Osmeña mohatag og P15M sa Comelec

CEBU, Philippines - Gustong mohatag si Cebu City Mayor Tomas Osmeña og P15 Milyones sa Commission on Elections sa siyudad aron mahinayon lang ang barangay elections karong Oktobre.

Gibutyag ni Osmeña nga duha ra ka rason nga ma-irog ang schedule sa barangay elections; usa kun mopasa ang Kongreso og balaudnon nga i-uswag na sab ang elections ug ikaduha ang dili paghatag og budget alang niini.

Matud sa mayor nga walay mabuhat ang siyudad kun adunay balaodnon nga ipasar ang Kongreso ug ang presidente. Sa pagkakaron, wala pay gipasar ang Kongreso nga dili madayon ang eleksyon sa barangay. Adunay 80 ka barangay ang siyudad.

Ang partido sa mayor nga Bando Osmeña Pundok Kauswagan nagdumala sa 14 ka mga barangay ug ang Barug Team Rama adunay 66 ka mga barangay.

Gusto sa mayor nga mailisan na ang mga opisyales sa barangay tungod kay subay sa balaod nga adunay eleksyon sa barangay matag tulo ka tuig.

Si North district election officer Lawyer Marchel Sarno nagpasalamat sa suporta sa siyudad sa Sugbo. Apan, matud niya nga ang Kongreso ug ang Presidente lang ang makabuot kon i-postpone o dili ang eleksyon. (BANAT NEWS)