Sixers nagpanikad ni Fultz, Lakers gisaytan si Ball
CEBU, Philippines - Nagpanikad na ang Philadelphia 76ers nga mokuha ni Markelle Fultz isip No. 1 overall pick sa gikahinaman nga 2017 NBA Draft ugmang adlawa didto sa Barclays Center sa New York.
Ang Boston Celtics mao unta ang mopili sa top pick, apan naangkon sa Sixers ang maong katungod gumikan sa nakab-ot nilang kasabotan niadtong Lunes.
Segun sa ilang nauyonan, ang Sixers maoy mobira sa No. 1 pick, samtang ang Celtics maoy mokuha sa No. 3 pick gawas nga makakuha sab kini og lain pang mas taas nga draft pick.
Si Fultz mi-average og 23.2 points, 5.9 assists, 5.7 rebounds ug 1.6 steals uban sa Washington Huskies sa miaging season, apan nangiwit ang ilang koponan sa NCAA uban ang 9-22 win-loss record.
Potensiyal hinuon ang 19-anyos nga si Fultz nga makapalig-on sa pundasyon sa Sixers sa tinguha niini nga makatukod balik og usa ka lig-ong puwersa uban nilang Ben Simmons, Jahlil Okafor, Joel Embiid ug Dario Saric.
Sa habig sa Los Angeles Lakers, ilang gisaytan isip No. 2 overall pick si Lonzo Ball nga bitoon sa University of California at Los Angeles
(UCLA).
Si Ball mipatik og 14.6 points, 7.6 assists, 6.0 rebounds ug 1.8 steals matag duwa alang sa UCLA Bruisn sa miaging season. (BANAT NEWS)
- Latest
