Gasol magpabilin sa Spurs

CEBU, Philippines - Dili makapahimulos si Pau Gasol sa $16.2 million nga suholan sa sunod nga NBA season segun sa nalatid sa iyang kontrata, apan nagplano kini nga magpabilin sa San Antonio Spurs.

Ang 36-anyos nga 7-footer nga nakadaog og duha ka titulo uban sa Los Angeles Lakers, mamahimo nang free agent, apan nanghinaut kini nga ang maong lakang makahatag kaniya og mas taas-taas nga kontrata uban sa Spurs.

Si Gasol andam nga modawat og suweldo nga mas gamay sa iyang balor aron ang Spurs makadaginot sa ilang salary cap sa ingon duna kini igong salapi nga ihaylo niadtong mga free agents nga gusto nilang kuhaon.

Sulod sa 16 ka seasons, ang six-time NBA All-Star mi-average og 17.9 points, 9.4 rebounds ug 1.7 blocks sulod sa 1,119  ka duwa uban sa Spurs, Chicago Bulls, Lakers ug Memphis Grizzlies.

Sama ni Gasol, si Dwyane Wade magpabilin sab sa Chicaco Bulls diin siya mobulsa og $23.8 million sa 2017-2018 season. Duna pa hinuo’y usa ka semana si Wade aron tumanon ang maong desisyon.

Sa lain pang mga kalamboan, sila si Dwight Howard sa Atlanta Hawks ug Brook Lopez sa Brooklyn Nets mobalhin og laing teams.

Si Howard gibaylo sa Hawks ngadto sa Charlotte Hornets puli nilang Miles Plumlee ug Marco Belinelli, samtang si Lopez mobiya sa Nets aron motapon sa LA Lakers sa usa ka-trade nga naghatod nilang D’Angelo Russell ug Timofey Mozgov ngadto sa Brooklyn.

Anaa pa unta si Howard sa unang tuig sa tulo ka tuig nga kontrata niya uban sa Hawks nga mibalor og $70.5 million. Sa iyang pagkalagpot sa Hornets, kini nagpasabot nga miduwa siya og managlahi nga teams sa miaging tulo ka tuig. Miduwa siya uban sa Houston Rockets niadtong 2015 season.

Samtang sa pagbiya ni Russell, wala na karo’y point guard ang Lakers mao nang ilang gisaytan si UCLA star Lonzo Ball sa 2017 NBA Draft ugmang adlawa. (BANAT NEWS)