Pacquiao dapig ni Mayweather
CEBU, Philippines - Walay isyu si Manny Pacquiao human gianunsiyo ang boxing match tali nilang Floyd Mayweather Jr. ug Conor McGregor.
Kini kay alang ni Pacquiao, ang kalampusan sa maong away mag-agad kun giunsa kini pagdawat sa fans.
“It’s up to the fans if they are going to patronize or see the fight,” matud pa ni Pacquiao segun sa taho sa Philstar.com.
Sila si Mayweather ug McGregor mipaukyab sa kalibotan sa paugnat sa kusog human ilang gikompirmar nga magboksing sila karong Agosto 26 didto sa T-Mobile Arena sa Las Vegas, Nevada.
Sa maong 12 ka hugna nga engkuwentro, ang duha ka personalidad garantisado nga mokita og milyones dolyares.
Ang duha nagagikan sa duha ka managlahing sports. Si Mayweather usa sa labing banggiitan nga mga boksidor sa kasaysayan, samtang si McGregor eksperto sa mixed martial arts ug kasamtangang hari sa Ultimate Fighting Championship.
Apan kay boksing man ang ilang awayan, si Pacquiao nagkanayon nga natural lamang nga si Mayweather maoy nakapabor.
“But Mayweather has the advantage. McGregor is not a boxer,” sumala pa ni Pacquiao nga anaa karon sa katapusang hunat sa iyang pagpangandam alang sa umaabot niyang pagdepensa sa iyang WBO welterweight title batok ni Jeff Horn karong Hulyo 2 didto sa Suncorp Stadium sa Brisbane, Australia.
Si Mayweather nga naglaraw mokulit og 50-0 record, miputol sa duha ka tuig niyang pagretiro aron makigharong ni McGregor, ang UFC lightweight champion. (BANAT NEWS)
- Latest
