Curry, Durant mohimo’g dinastiya

CEBU, Philippines - Ang mga bitoon sa Golden State Warriors nga silang  Stephen Curry ug Kevin Durant andam nga mosakripisyo sa tinguha nga tabangan ang koponan aron magpabilin nga usa ka lig-on ug kahadlokang puwersa.

Sa estado nilang Curry ug Durant, makalisang nga kantidad ang tataw nga malatid sa umaabot nilang kontrata uban sa Warriors, apan dili nila igsapayan kun mas gamay ang salapi  ilang madawat basta intak lang gihapon ang ilang grupo ilabi na kay naglaraw sila nga mohimo og dinastiya sa NBA.

Tulo ka adlaw human gilangkat ang ikaduha nilang kampiyonato sulod sa tulo ka tuig human gipaluhod si LeBron James ug ang Cleveland Cavaliers, ang Warriors nagplano na dayon sa sunod nilang lakang.

Sa iyang bahin, si Durant nagkanayon nga walay kuwestiyon sa iyang huna-huna nga mobalik siya uban sa Golden State. Gani nagparamdam na ang Finals MVP nga mosugot siya tanyagan og kontrata bisan og mas gamay sa tinuoray niyang balor aron matabangan ang Warriors nga makuha og balik si Andre Iguodala o Shaun Livingston, ang duha sa labing tadhan nilang reserve players nga dako og natampo sa koponan.

Sila si Durant ug Curry nagkahiusa sa pag-ingon nga ang nakanindot sa Warriors kay bisan og pulos sila dunay pamilya nga gipakaon, wa’y ulo nga midako ug wa’y garbo nga mipasulabi kanila kun kuwarta na ang hisgutan gumikan kay ang ilang mentalidad pareho man alang sa kaayohan sa ilang team. (BANAT NEWS)