VesCon, ASPA magtige na sa titulo

CEBU, Philippines - Mosuway ang VesCon Construction nga usban og parot ang ASPA Scaffolding sa dihang mag-abot na sab sila sa seguradong dumot nga rematch alang sa kampiyonato sa 2017 Mayor Tomas Osmeña Independence Day Cup inter-commercial basketball tournament karong adlawa diha sa Cebu City Sports Institute.

Ang VesCon ug ASPA mag-ilog sa titulo sa alas-7 sa gabii, human ang RCR Structures makigharong batok sa LM Paragsa Designs alang sa ikatulong dapit sa alas-5 sa hapon. Ang mga duwa libre sa publiko.

Ang VesCon ni coach Jojo Romarate milampaso sa ASPA, 117-87, niadtong Sabado aron pagkumpleto og 3-0 sweep sa eliminasyon.

Hinoon ang ASPA, nga miabante gihapon sa final bitbit ang baraha nga 2-1, daw wala kayo maninuod sa maong duwa ilabi na kay wala niadtong tungora ang pipila ka sinaligan nilang mga magduduwa.

Ning higayon diin korona nay hisgutan, tataw nga solido nang puwersa ang ibangga sa ASPA batok sa VesCon.

Gipaabot nga mangu sa kumbati sa ASPA mao sila si Frangel Omolon, Rory Paspie, Rumar Ponce, Warren Caneta, Arnold Quilaton, Mike Sereno ug Anthony Linao.

Sa habig sa VesCon, iparada niini sila si Mark Abadia, Mark Ababon, Franklin Nailon, Harold Cincoflores, Ronan Isidro ug Merbien Dedace.

Ang VesCon duna say 6’7” Liberian import nga si Bassieru Sackor ug ang ilang puwersa misamot pa og kalig-on nunot sa presensiya nilang Jan-Jan Navarro, Rolan Doy, Mark Kong ug Joey Manguerra.

Ang modaog sa duwa tali sa VesCon ug ASPA mobulsa og P50,000. Ang mapilde modawat og P30,000, samtang ang mopahiluna sa ikatulong puwesto moangkon og P20,000.  - EBV (FREEMAN)