300 athletes modagan sa Rotary Triathlon

CEBU, Philippines - Miabot ngadto sa 300 ka lokal ug langyaw’ng mga atleta ang modagan sa 1st Rotary Corporate Triathlon karong Domingo didto sa Mactan Newtown, Lapu-Lapu.

Si Steve Maniquis, ang presidente sa Cornerstone Group nga maoy nag-organisa ning maong lumba, miingon nga ang mga Pinoy magsagubang og lisud nga hagit batok sa pipila ka mga partisipante gikan sa America, France ug Australia.

Sa iyang bahin, si konsehal Harry Radaza nagkanayon nga ilang gisuportaan ang maong kalihukan gumikan kay alang kini sa maayong kawsa, partikular na kadtong mga kabus nga mga bata nga dunay gihambin nga sakit sa kasingkasing.

Ang tanan nga makita sa maong karera nga naglangkob og 1.6km swim, 50km bike ug 10km run  mapunta sa programang ‘Gift of Life’ sa Rotary Club of Cebu. (BANAT NEWS)