Lebron ngilngig, apan wala gihapo’y nahimo sa Cavaliers
CEBU, Philippines - Ngilngig kaayo nga duwa ang gipakita ni LeBron James sa nag-unang duha ka duwa sa NBA Finals, apan sa gihapon wala siya’y nahimo sa kampo sa Cleveland Cavaliers nga kanunay gilat-an sa Golden State Warriors.
Samtang si James mihimo og impresyon – mikadlit siya og triple-double nga 29 points, 11 rebounds ug 14 assists sa Game-2, dili kini igo batok sa Warriors nga gidayan-dayanan og mga bitoong magduduwa.
Bisan pa gani si Kevin Love miabag ni James sa opensa sama sa gibuhat ni Kyrie Irving sa Game 1, wala gihapon kaugpo ang Cavs nga nasugamak na sab ngadto sa 132-113 nga kaparotan hinungdan sa 0-2 nilang pagka-alkanse sa best-of-seven series.
Karon nga motapon na ang serye didto sa ilang teritoryo alang sa Games 3 ug 4 karong Huwebes ug Sabado, si James nagkanayon nga labing maayo nilang buhaton mao ang pagpangita og paagi nga makaladlad sila og mas maayong duwa inay nga maghuna-huna sa nahitabo sa miaging Finals diin sila milagrosong nakabawi human malubong og 3-1 dayon na ngadto sa pagpakaulaw sa Warriors ug pagsakmit sa labing una nilang NBA title. (BANAT NEWS)
- Latest