Lancers namawi, Panthers gipakuratan si Yayoy ug UC

SAINT BERNARD, So. Leyte, Philippines — Ang University of the Visayas Green Lancers impresibong mibangon gikan sa pagkahisukamod, samtang  University of Southern Philippines Foundation Panthers mikuha sab og atensiyon sa ikaduhang adlaw sa aksiyon sa 2017 St. Isidore Parish Fiesta Inter-Collegiate Basketball Invitational Cup.

Human miyukbo sa Southwestern University-Phinma Cobras,  75-78, ang Lancers ni coach Gary Cortes parehong milubong sa Panthers ug University of San Carlos Warriors.

Ang Lancers unang nakatilaw og daog human gilampurnas ang Panthers, 78-59, ug ila kining gisundan pinaagi sa 96-64 nga demolisyon  sa Warriors.

Sukwahi sa ilang duwa sa Panthers, ang Lancers bugnaw ang sinugdanan batok sa Warriors hinungdan nga na-alkansi sila og siyete puintos, 14-21 sa sayong bahin.

Ang Lancers dali hinoon nga miresbak pinaagi sa mainit nga 20-6 rally hinungdan nga mao na kini ang naglabaw sa halftime, 34-27.

Misamot pa ang kalbaryo sa Warriors human na-ejected ang usa sa mga sinaligan niini nga si Julius Cavadis gumikan sa pagsukmag niini ni UV import Bassieru Sackor sa oras nga  8:06 sa ikatulong kuwarter.

Si Cavadis gi-ban sa nahibiling bahin sa torneyo gawas nga gipamulta kini og P3,000 nga ihatag sab ngadto ni Sackor sigun sa lagda sa liga.

Daw sa dili maayong timailhan ang nahitabo kay human mibiya si Cadavis, si CESAFI MVP Rey Suerte mitusak og upat ka sagunson nga tres hinungdan nga kalit gibuak sa Lancers ang duwa pabor kanila bitbit ang 20 puntos labaw, 69-49, human sa maong kuwarter.

Misamot pa ang kainit sa Lancers hinungdan sa paglabaw niini og 34 puntos, 96-92, sa hilimatyong oras nga nahibilin.

Si Suerte mitapos uban ang 20 puntos samtang si Jayson Balabag miamot og 14 puntos sa Lancers, nga nanginahanglan na lang karon og usa ka daog aron makasud na sa final.

Sa laing duwa, ang Panthers ni coach Albert Alocillo mihimo og dakong surprisa human ilang gitumba ang  University of Cebu Webmasters ni coach Yayoy Alcoseba, 83-76.

Nahimong bayani sa maong makapakugang nga kadaogan sa  Panthers mao sila si CD Avancena, Kenneth Cada ug Mike Patalinghug.

Human miabante og balik ang UC  73-69, silang tulo misalbar sa Panthers pinaagi sa paglusad og 11-2 run nga nakahatag kanila og 80-75 labaw sa nahibilin nga 27 segundos. Wala na kaugpo pa sukad niadto ang Webmasters nga nakatilaw sa  labing una niining pilde. (BANAT NEWS)