Minglanilla gi-usban ang Talisay sa Gov. Cup
CEBU, Philippines - Gi-usban og parot sa Minglanilla ang Talisay City apan nag-agi una sila og makuyaw nga dalan sa wala pa moposte og kulbahinam nga 80-78 nga kadaogan pagsikad sa South Division quarterfinals sa 2017 Cebu Governor’s Cup Under-21 Inter-Cities and Municipalities Basketball Tournament didto sa Samboan municipal gym niadtong Sabado sa gabii.
Si Mark Justine Nebril milansang og tulo ka tres sa iyang 11 puntos sa ikaduhang kuwarter aron pag-aswat sa Minglanilla ngadto sa dos puntos nga labaw sa halftime, 42-40.
Ang igsoon ni Mark nga si Marc Glen Nebril mao na sab dayon ang nanginit diin kini mibubo og 10 puntos sa ikatulong kuwarter aron pag-inat sa labaw sa Minglanilla ngadto na sa sayes puntos, 62-56.
Misuway pa unta pag-agak si Jhiey Paraldo sa Talisay sa iyang mga abaga apan ang nag-inusara niyang pakigbisog dili igo aron pagsalbar sa iyang koponan.
Samtang ang Minglanilla nakakuha sa gikinahanglan niining mga puntos gikan nilang Jan Josehn Mangaron ug Jiesel Tarrosa hinungdan nga nakaeskapo sila ngadto sa dos puntos nga kadaogan.
Ang managsoon Nebril nga sila si Mark Justine ug Marc Glen nagkumboya og 41 puntos, samtang sila si Tarrosa ug Mangaron nakatigum og 29 puntos alang sa Minglanilla.
Si Paraldo mipabuto og 33 puntos apan wala siya'y nahimo alang sa kawsa sa Talisay.
Sa ubang nga duwa, ang Dalaguete mitumba sab og usab sa Samboan, 76-65, ingon man ang Toledo City batok sa Barili, 88-79. - EBV (BANAT NEWS)
- Latest
