Draymond Green naghinam-hinam sa Cavaliers-Warriors trilogy

CEBU, Philippines - Bisan og mag-abot sila sa ikatulo nang sunod-sunod nga higayon, si Golden State star forward Draymond Green gibati gihapon og tumang kahinam nga harungon sa iyang Warriors ang Cleveland Cavaliers sa NBA Finals.

Sukwahi sa pagtan-aw sa uban nga ‘laay’ ug makaduka nang tan-awon nga magtigi na sab ang duha ka higanteng koponan sa kampiyonato, si Green nagkanayon nga kining maong senaryo makaayo alang sa liga.

“I think it’s a great thing for the league, contrary to popular belief where everyone says it’s boring,” matud pa ni Green.

Alang ni Green, angayan pa gani daygon ang Cavs-Warriors trilogy gumikan kay nakahatag man kini og makalingaw ug kulbahinam nga serye sa mga fans.

Sa iyang bahin, ang tag-iya sa Warriors nga si Joe Lacob mismo ang mipadayag sa publiko nga gusto niya ilang makaharong og usab ang Cavs sa tinguha nga makabawos sa gihimo  niining pagpakaulaw kanila sa miaging season.

Sa miaging NBA Finals, ang Warriors misutoy ngadto sa 3-1 nga labaw, apan ang Cavs ubos sa pagpangu ni LeBron James, miharos og daog sa sunod nga tulo duwa aron paghatag sa Cavs sa labing una niining titulo sa NBA.

Sa ikatulo nilang panag-abot, ang Warriors moatubang sa Cavs nga wa’y pilde sud sa 12 ka duwa sa playoffs.

Kun siya’y pabut-on, si Green gusto nga ilang i-sweep ang Cavs sa ingon ilang tapuson ang playoffs nga wa’y pilde.

Apan dili malalis nga bukid maoy tungason sa Warriors sa ilang best-of-seven finals series batok sa Cavs nga sugdan karong Hulyo 2 didto sa ilang nataran. (BANAT NEWS)