Governor’s Cup quarter finals banatan karon
CEBU, Philippines - Mosamot og kainit ang aksiyon sa 2017 Cebu Governor’s Cup Under-21 Inter-Cities and Municipalities Basketball Tournament gumikan kay sugdan na ang quarterfinal round karong adlawa didto sa Samboan municipal gym.
Ang Samboan nanghinaut nga makapahimus sa ilang homecourt advantage sa dihang mo-host sila sa bisitang Dalaguete sa main game nga gikatakda sa alas-8 sa gabii.
Sa pasiunang duwa sa alas-5 sa hapon, ang Toledo City makigtigi sa Barili, samtang ang Talisay City naglungot-lungot nga makabawos sa Minglanilla sa gipaabot nga dumot nilang rematch sa alas 6:30 sa gabii.
Ang gubat sa North mosikad karon pang Mayo 29 didto sa Mandaue City Sports and Cultural Complex diin ang Mandaue ug Bogo City naglaraw nga inaton ang nagbaga nilang pagratsada.
Ang Mandaue ug Tuburan nga pulos wa’y pilde mag-abot sa alas-8 sa gabii, samtang ang Bogo human naka 5-0 sweep sa eliminasyon, masukod ang katakus sa dihang ilang sangkaon ang Consolacion sa alas- 6:30 sa gabii.
Sa laing sangka, ang Bantayan nga maoy bugtong team ni-qualify sa sunod nga hugna makigharong sa Balamban sa alas-5 sa hapon.
Ang sunod nga hugna sa torneyo magsubay gihapon og single round robin format diin ang top 2 sa North ug South mag-abot sa division finals sa usa ka best-of-three series. Ang maghari matag division magsangka dayon sa overall champion sa usa gihapon ka best-of-three series.
(BANAT NEWS)
- Latest