Cebu teams magtige na sa Saint Bernard
SAINT BERNARD, Southern Leyte, Philippines – Sugdan na sa labing tang-an nga mga basketbolista sa Sugbo ang mainit nilang duwa gumikan kay ang 2017 St. Isidore Parish Fiesta Invitational Cup mosikad na karong adlawa.
Sa lima ka mga koponan, ang reigning Cebu Schools Athletic Foundation, Inc. (CESAFI) champions University of the Visayas Green Lancers, Southwestern University-Phinma Cobras ug ang University of Southern Philippines Panthers mao ang dunay labing bug-at nga tahas gumikan kay moduwa sila duha ka higayon karon.
AngLancers ni coach Gary Cortes makigharong batok sa Cobras sa alas-9 sa buntag, ug dayon makigduwa sa Panthers ni coach Albert Alocillo sa main game sa alas-8:30 sa gabii.
Human sa unom ka oras nga pahuway, ang Cobras motaak na sab sa korte aron makigpinaksitay sa University of Cebu Webmasters sa alas-7 sa gabii, samtang ang Panthers unang moasdang sa korte batok sa University of San Carlos Warriors sa ala-1 sa hapon.
“Unsay mas labaw pa sa tinguha nga modaog mao ang pagpakita nga tinuoray nga kahulogan sa sportsmanship. Mao kini ang hinungdan ning maong kompetisyon,” matud pa ni Rev. Fr. Joselito ‘Joy’ C. Catubig, ang kura paroko sa St. Isidore Parish.
Si Fr. Catubig maoy nagpasiugda ning torneyo agi’g pagtambayayong sa Saint Bernard LGU ubos sa liderato ni Mayor Manuel Calapre ug sa tinamod nga coach ug league organizer Van Halen Parmis.
Molamas sa torneyo mao ang debut sa tulo ka mga coach sa bag-o nilang mga teams. Kini mao sila si Raul ‘Yayoy’ Alcoseba sa UC, Mike Reyes sa SWU ug Bong Abad sa USC.
Ang mga entrante moduwa subay ang single round robin format. Ang top 2 teams maoy mag-abot sa tinaktakay nga kampiyonato. (BANAT NEWS)
- Latest