JJ Surplus 8th Conference sugdan na karong gabii

CEBU, Philippines - Ang gikahinaman nga  JJ Surplus Ballclub 8th Conference basketball tournament mosikad na karong gabii didto GT Academy School gym sa Tayud, Lilo-an.

Sugdan ang aksiyon sa alas-7 sa gabii diin magsangka ang JJ Surplus batok sa Edwin Ponce Catering, sundan sa duwa tali sa EF Surplus ug Northern Energy, dayon ang lahugay sa Union Galvasteel batok sa WD Construction.

Katorse ka teams nga gibahin sa duha ka bracket ang mag-ilog sa korona.

Ang mga koponan uban sa ilang team manager ubos sa bracket A mao ang EF Surplus ni Fury Trazona, Union Galvasteel ni Arnold Labustro, Pag-utlan ni Titing Aton, Gyro Steel ni Lando Mendoza, WD Const. ni Peter Mereve, Villa Reyna Subd. ni Joel Camello ug Northern Energy ni Rey Tiongson.  Samtang sa bracket B mao ang JJ Surplus ni Henry Agbon, Ponce Catering ni Camelo Ortiz, Veneranda Subd. ni Jojo Satuita, D’ Jammerz ni Albert Icot, Victorious Eagle ni Danrex Bayonla, GT Northeast Academy ni Joe Laurito ug Yufo All-Star ni Ramon Estole. Mosubay sila og single round format diin ang top 2 teams sa matag bracket makaangkon og twice-to-beat batok sa no. 2 ug 3 sa quarterfinals ug ang modaog   mopailawom sa crossover semifinals. Ang format sa semis mao: no. 1A batok no. 2B ug no. 1B batok no. 2A diin ang modaog maoy mag-abot sa best-of-three finals. Ang mga duwa ubos sa superbisyon ni league commissioner Fury Trazona uban ni technical committee Chang Tejero. Ang liga nahimo pinaagi sa paningkamot sa ilang presidente nga si Henry Agbon. (BANAT NEWS)