Mayor Tom Osmeña Inter-Commercial Basketball gitakda

CEBU, Philippines - Ang mga Sugbuanon makasaksi na sab og kulbahinam nga duwa sud sa korte sa mas taas nga kalibre sa aksiyon   sa ipahigayon nga 2017 Mayor Tomas Osmeña Cup Independence Day Inter-Commercial basketball tournament karong Hunyo 8-12 diha sa Cebu City Sports Institute.

“Taud-taud na sab ta wa’a makapahigayon og commercial tournament dinhi sa atong dakbayan mao nang ato ning gipasiugdahan ning maong kalihukan aron masadya og balik sa Cebu basketball,” matud pa ni league commissioner Lito Manguerra.

Upat ka mga koponan ang magtigi sa kampiyonato nga nagtangag og dakung ganti. Kini mao ang Aspa, RMA Logistics, Vescon Construction ug RCR Structures.

Moduwa sila ubos sa single round robin format, diin ang top 2 teams maoy magtigi sa tinaktakay nga kampiyonato.

Ang makampiyon mobulsa og P50,000, samtang ang mopahiluna sa ikaduha ug ikatulong dapit modawat og P30,000 ug P20,000.

Ang upat ka adlaw nga torneyo gipaluyohan sa Cebu Sea Life, usa ka  oceanarium sama sa Ocean Park didto sa Manila nga moabli sa Pebrero 2018 duol sa SM Seaside. (BANAT NEWS)