Horn nagmaya sa pagbahar ni Pacquiao
CEBU, Philippines - Gibati og tumang kalipay si Jeff Horn sa dihang nasayod sa dili maayong gipakita ni Manny Pacquiao atol sa sparring session niini.
Segun sa taho ni Grantlee Kieza sa Courier-Mail, ang 29-anyos nga si Horn mideklara nga anaa siya karon sa labing maayong kondisyon sa iyang karera ug gipahugtan pa niya og maayo ang iyang pagbansay-bansay sa umaabot nilang away ni Pacquiao.
Sukwahi ni Horn, si Pacquiao daw sa gitay-an ang abilidad ug nagmika kini sa iyang sparring niadtong Martes nga gihulaway ni Hall of Fame trainer Freddie Roach nga maoy labing bati nga iyang nakita sa iyang boksingero atol sa usa ka training camp.
Gumikan niini, si Roach nabalaka og maayo ilabi na kay uwahi kaayo sila sa iskedyul
Alang ni Horn, usa kini ka maayong balita.
“I’m hearing all the reports that Pacquiao looks terrible sparring and that’s great,” matud pa ni Horn nga mosuway og langkat sa korona ni Pacquiao isip WBO welterweight champion karong Hulyo 2 didto sa Suncorp Stadium sa Brisbane, Australia.
Midugang si Horn nga ang pagkakompiyansa ni Pacquiao maoy usa sa mga hinungdan sa pagkahagba niini.
“All along I think he has been underestimating me. His mates would have been telling him for weeks that I’m not in the class of the guys he’s beaten and I hope they keep telling him that,” matud sa wala pa’y pildeng Australyano dungan sa pagbahad nga iya unyang tay-ugon ang kalibotan sa boksing. (BANAT NEWS)
- Latest