Matapos na kaha?
CEBU, Philippines - Mismo si Cleveland Cavaliers star LeBron James ang miangkon nga dili sayon nga tahas ang sagubangon nila karon diin tuyo niya nga tuldokan na ang serye aron moabante sa NBA Finals.
Ang Cavaliers naglabaw sa serye, 3-1 sa “best-of-seven” NBA Eastern Conference finals, mosuway pagtaktak sa Boston Celtics sa Game-5 karong adlawa didto sa TD Garden sa Boston, Massachusetts.
Human modaog sa unang duha ka duwa sa serye, ang Cavs nabawsan sa Celtics sa Game-3 ug diriyot sab sila mapilde sa Game-4 bisan pa og wala na miduwa ang franchise player sa Boston nga si Isaiah Thomas tungod sa injury.
Si James miingon nga nausab ang mga Celtics players ug mipakita sila karon og determinasyon nga modaog.
“The close out game is always the hardest and Boston is going to make it even harder,” matud pa ni James sa Associated Press.
Usa usab sa gamay’ng problema sa coaching staff sa Cavalivers mao nga dili nila kaayo mapaduwa ang All-Star nga si Kyrie Irving nga miiskor og 42 puntos ug maoy bayani sa ilang kadaugan sa Game-4. Si Irving adunay gihambin nga minor injury sa iyang tiil nga iya usab nahiaguman sa miaging duwa. Gumikan niini, gusto ni Cavs coach Tyronn Lue nga magtam-bayayong ang iyang mga key players sama nila Kevin Love, Tristan Thompson, JR Smith, Kyle Korver ug Eman Shumpert.
Sa ilang bahin, ang Celtics nga wala pa mawagtangi og paglaum, maninguha nga modaog aron mahayagan pa ilang kahigayonan alang sa luna sa Finals.
Itugyan ni coach Brad Stevens ang iyang pagsalig ngadto nilang Al Horford, Jae Crowder, Avery Bradley ug Marcus Banks. (BANAT NEWS)
- Latest