Yayoy mopas-an unang misyon sa Webmasters

CEBU, Philippines - Wala pa mag-usa ka bulan human siya gitudlo nga head coach sa University of Cebu college basketball team, si Raul ‘Yayoy’ Alcoseba mopas-an dayon sa una niyang misyon sa dihang ang Webmasters mosalmot sa St. Isidore Parish Fiesta Invitational Cup 2017 karong Mayo 27-29 didto sa Saint Bernard, Southern Leyte.

Si Alcoseba nga wa’y lalis maoy winningest coach sa kasaysayan sa Cebu basketball, nagkanayon nga ang  tulo ka adlaw nga torneyo usa ka oportuntidad alang kaniya aron mailhan niya og maayo ang iyang mga players ug ingon man sukdon ang ilang kalibre agi’g pangandam sa umaabot nga Cebu Schools Athletic Foundation, Inc. (CESAFI) season.

“The invitation to play in Leyte is very timely. It’s a chance for me to bond with my players so I can get to know them and they can get to know me also,” matud pa ni Alcoseba nga nakabira na og upat ka collegiate titles ug mipasalig nga motunol og usa sa Webmasters sud sa tulo ka tuig.

Isip coach sa Webmasters, si Alcoseba bunyagan og kayo sa ilang pakighamag batok sa CESAFI champion University of the Visayas Green Lancers, kanhi niya team nga Southwestern University-Phinma Cobras, University of Southern Philippines Foundation Panthers ug University of San Carlos Warriors.

Moduwa sila ubos sa single round robin format. Ang nag-unang duha ka teams maoy mag-abot sa tinaktakay nga kampiyonato.

Ang makampiyon modawat og P100,000, samtang ang mopahiluna sa ikaduha ug ikatulong dapit mobulsa og P70,000 ug P50,000. Kadtong mangiwit hatagan og P20,000 matag usa. Gawas niini, mohatag sab og libreng hotel accommodation, pagkaon ug transportasyon ang mga organizers nga gipangulohan sa Saint Bernard LGU ubos sa liderato ni Mayor Manuel O. Calapre ug Rev. Fr. Joselito C. Catubig, nga maoy kura paruko sa St. Isidore Parish. (BANAT NEWS)