Cavs, 3-1 na
CEBU, Philippines - Nagkumboya og 76 puntos sila si Kyrie Irving ug LeBron James alang sa Cleveland Cavaliers nga nanglimbasog og maayo aron mokulit og 112-99 nga kadaugan batok sa Boston Celtics sa Game-4 kagahapon didto sa Quicken Loans Arena sa Cleveland, Ohio.
Ang daog naghatag sa Cleveland og 3-1 nga bentaha sa best-of-seven Eastern Conference ug usa na lang ka daog ang ilang kinahanglan aron hingpit silang moabante sa NBA Finals.
Kun modaog ang Cavs, sangkaon nila ang Golden State Warriors sa NBA Finals sa ikatulong sunod-sunod nga higayon.
Ang Cavs nga gipakuratan sa Celtics sa Game-3 human sila naglabaw og 25 puntos, daw sa nagbarog na sab sa bung-aw sa kapildihan gumikan kay ang Celtics mao man ang midominar sa first half.
Human mikamada 29-19 nga abante, ang Celtics nakasustinir sa ilang kainit aron sa pagprotehir sa ilang 10 puntos nga labaw sa halftime, 57-47.
Apan sa dihang misaka ang tensiyon sa home fans didto sa Quicken Loans Arena, si Irving madasigon nga midala sa papel isip bayani nga misalbar sa Cavs. Si Irving mipatuasik og 21 puntos sa ikatulong kuwarter aron makan-an ang labaw sa Celtics, 87-80 sa nahabiling 12 minutos sa duwa. Sa kinatibuk-an si Irving mitapos og 42 puntos.
Si James nga determinadong makabawi human napugngan ngadto lamang sa 11 puntos sa Game-3, mikayod og maayo sa katapusang kuwarter aron santaon ang tinguha sa Celtics nga makabangon pa. Ang four-time MVP mitapos sa duwa uban ang 34 puntos.
Wala sab magpabitin si Kevin Love nga mibahog og 17 puntos, 17 sab ka rebounds ug lima ka assists.
Si Avery Bradley mihipos og 19 puntos alang sa Celtics nga nanghinaut nga malugwayan pa ang serye sa ilang pag-host sa Game-5 karong Biyernes. (BANAT NEWS)
- Latest
