Velarde hari sa Mayo sa CEPCA monthly
CEBU, Philippines - Si John Velarde maoy nanghawod sa May edition sa binulan nga torneyo sa Cebu Executives and Professionals Chess Association (CEPCA) niadtong Domingo didto sa EGI Resort and Hotel sa Maribago, dakbayan sa Lapu-Lapu.
Human nakaangkon og ‘bye’ sa unang hugna, si Velarde nga mao ang Central Visayas coordinator sa National Chess Federation of the Philippines (NCFP), miharos og daog sa sunod niyang upat ka duwa batok nilang Manny Manzanares, Naureen Bagano, Jun Kidlat ug KC Morala aron pagtapos sa five-round Swiss system competition uban ang labing taas nga 4.5 puntos. Gumikan niini, si Velarde nakabira og luna ubos sa Group B sa grand finals nga gitawag sab nga ‘Battle of Champions’ karong Disyembre uban nilang Manuel Abucay, Adrian Val Paraiso, Mario Bustillo ug Jun Kidlat.
Si Jave Peteros nga maoy naghari sa miaging bulan, Ruel Hortelano ug Percy Fiel parehong mitali og 4.0 puntos, apan si Peteros maoy mipahiluna sa ikaduhang puwesto gumikan sa mas taas niining tie-breaker. Si Morala maoy nagkumpleto sa top 5 uban sa iyang 3.5 puntos.
Human sa torneyo, ang Cepcans nga gipangulohan sa ilang presidente nga si Engr. Jerry Maratas pormal nga mihurar sa bag-o nilang mga miyembro nga sila si Gerry Dignos sa OPASCOR ug Willy Lozada, usa ka computer engineer. (BANAT NEWS)
- Latest