Buk-anay sa baraha
CEBU, Philippines - Ilogan na sa Meralco Bolts ug Star Hotshots ang labing importante nga duwa sa elimination round tungod kay ang modaog makaangkon og ‘twice-to-beat’ advantage sa playoffs sa PBA Commissioner’s Cup.
Ang Meralco ug Star nga nagsawo sa unang dapit sa ilang 7-2 nga baraha, magsangka karong alas-7 sa gabii human sa duwa tali sa Alaska Aces ug sa natagak na nga NLEX Road Warriors.
Ang Bolts ug Hotshots pulos mihimo og impresibong performance sa elimination ug iyahay sila karon og paningkamot nga makuha ang twice-to-beat advantage nga mopadaku sa ilang tsansa nga makabalik sa PBA finals.
Ang mapilde sa duha peligro nga matagak sa top two seeds ilabi na nga nagpaabot ang Barangay Ginebra Kings (6-2), San Miguel Beermen (6-2) ug TNT KaTropa (7-3) nga moilog sa laing luna sa playoffs.
Atngan karon ang panag-abot sa duha ka mga banggiitang import karon nga conference nga sila si Alex Stepheson sa Meralco ug Ricardo Ratliffe sa Star. Si Stepheson nag-average og 22.3 points ug 17.8 rebounds sa conference, samtang si Ratliffe nagbangis sa katapusang duwa sa Star diin miburak siya og 37 puntos batok sa TNT.
Gawas ni Ratliffe, laing hinagiban nga gamiton sa Hotshots karong gabii mao ang duha nila ka Gilas Pilipinas cagers nga sila si Allein Maliksi ug Jio Jalalon nga moduwa na og balik. (BANAT NEWS)
- Latest