Melindo mibasura hagit ni Petalcorin

CEBU, Philippines - Ang bag-ohay pang gikoronahan nga International Boxing Federation light flyweight champion nga si Milan ‘El Metodico’ Melindo wala modawat sa hagit ni IBF ranked No. 4 108-pounder Randy Petalcorin sa General Santos City alang sa usa ka talagsaon nga all-Filipino world championship fight.

Pipila ka adlaw sa wala pa si Melindo gikatakda nga mohagit ni Akira Yaegashi, si Petalcorin nga maoy IBF Pan-Pacific champion ug miaway ubos sa Sanman Boxing Club nga tua magbasi sa Gensan, mipadayag sa iyang interes nga hagiton ang modaog sa maong away.

Si Melindo maoy miguwa nga mananaog diin gilangkatan niini si Yaegashi og bakus bugti sa makapakugang nga kadaugan pinaagi sa first round TKO niadtong Domingo didto sa Ariake Coliseum sa Tokyo, Japan.

Ang maong lakang ni Petalcorin hugtanon nga gipaluyohan sa iyang manedyer nga si Sanman Promotions CEO Jim Claude ‘JC’ Manangquil.

Ang 24-anyos nga 'Promoter of the Year' wa’y nakitang dautan kun ugaling magsangka ang duha ka Pinoy sa usa ka world title bout.

 “I think this is one of the things we need to accept to bring back the glory day of Philippine boxing,”  matud pa niya.

Apan lahi ang dagan sa huna-huna ni ALA chief trainer Edito ‘ALA’ Villamor. “Sa pagka karon, nagpasalamat mi ni Milan nga nakahatag siya og dungog sa Pilipinas. Ang Filipino vs. Filipino sa pagka karon kinahanglan pa gyud ta og daghan nga mga Filipino champions then maabot ra na siya kun naa na gyud ta daghan champions,”  sumala pa ni Villamor.

Sa dihang gipangutanan kun iya bang dawaton ang hagit, si Melindo nagduha-duha pagtubag sa sinugdanan. “Dili pa ko katubag ana.” Apan sa dihang gisukna pag-usab, dakung ‘dili’ mubong tubag sa garbo sa Cagayan de Oro City.

Sa kasaysayan sa Philippine boxing, kausa pa mahitabo nga ang duha ka Pinoy nag-abot sa usa ka world championship match tali nilang Pancho Villa ug Clevel Sencio niadtong Mayo 2, 1925 didto sa Wallace Field nga mao na karon ang Luneta Park didto sa kaulohan. Si Villa midaog pinaagi sa unanimous decision sud sa 15 ka hugna ug nadepensaan  ang iyang world flyweight title. (BANAT NEWS)