Abante na’s NBA Finals
CEBU, Philippines - Mikawat og atensiyon silang Stephen Curry ug Kevin Durant sa dihang gikompleto sa Golden State Warriors ang ilang 4-0 sweep sa San Antonio Spurs aron moabante sa NBA Finals sa ikatulong sunod-sunod nga higayon.
Si Curry mipatuasik og 36 puntos ug si Durant miiskor og 29 sa 129-115 nga kadaugan sa Warriors nga maoy nagtuldok sa ilang ‘best-of-seven’ Western Conference finals series batok sa Spurs.
Mao kadto ang ikatulong series sweep sa playoffs karon nga season sa Warriors nga nagtangag og 12-0 nga baraha sa NBA Finals ug lagmit mag-rematch sila sa karibal nilang defending champion Cleveland Cavaliers.
Si Durant nga milangkat sab og 12 ka rebounds ug upat ka assists, malipayon nga makataak siya og balik sa finals.
Sa iyang bahin, si Curry nagkanayon nga ang ilang tandem ni Durant naghatag kaniya og dugang kadasig.
Taliwala sa mapait nilang kaparotan sa duwa nga mao na’y katapusan sa ilang star guard nga si Manu Ginobili, si Spurs coach Gregg Popovich midayeg sa Warriors. Gani iya kining gibutang sa ilang starting five agi’g pagrespeto sa tinamod nilang guwardiya nga uban nilang Tony Parker ug Tim Duncan nakatunol og lima ka kampiyonato sa Spurs.
Nagkagidlay nang daan kay wala si Parker nga gisamotan pa sa pagka-injured sa alas nilang si Kawhi Leonard, wala na’y nahimo pa ang Spurs aron lugwayan ang serye.
Sa gihapon, bangis kaayo ang Warriors nga wala na molingi pa human giablihan ang duwa pinaagi sa mainit nga 21-7 run. Human sa tulo ka kuwarter, miburot ang ilang labaw ngadto sa 18 puntos, 96-78. (BANAT NEWS)
- Latest
