Tuburan mikompleto sa 6-0 sweep, balamban sud sa Governor's Cup quarterfinal

CEBU, Philippines - Ang Tuburan mipakgang sa Balamban, 87-75 aron pagharos og daog sa unom ka duwa nila sa eliminasyon ubos sa North Division Bracket 2 sa  2017 Cebu Governor's Cup 21-Under Inter-Cities and Municipalities Basketball Tournament niadtong Domingo sa gabii didto sa Balamban Sports Complex.

Bisan pa man og napilde, ang Balamban nakigduyog gihapon sa Tuburan ngadto sa quarterfinal round bitbit ang  4-2 win-loss record, salamat sa 67-58 nga kadaugan sa Carmen nga nagtagak sa Danao City ngadto sa 3-3.

Sa laing bahin, nindot ang gihimong panamilit sa Asturias human gipilde niini ang Borbon, 84-75 alang sa bugtong nilang daog sa unom ka duwa.

Init nga sinugdanan ang gidiga sa Balamban hinungdan nga mao kini ang unang naglabaw, 23-17, apan ang Tuburan milusad og nagkayong rally sa ikaduha ug ikatulong kuwarter aron pag-usab sa dagan sa duwa pabor kanila.

Sila si Mike Parilla, Miguelito Jusay ug Romeo Dizon maoy misalida og maayo sa Tuburan nga maoy miguwang topseed sa N2. Si Parilla mipabuhagy og 29 puntos, samtang sila si Jusay ug Dizon nagkumboya’g 31 puntos.

Gawas sa Tuburan ug Balamban, miabante sab sa North Division quarterfinals ang Mandaue City (5-0), Bogo City (5-0) Consolacion (4-1) ug ang Bantayan (3-2).

Sa South division, nakaangkon og luna sa sunod nga hugna mao ang Talisay City (4-1), Dalaguete (5-1), Toledo City  (5-0),  Minglanilla (4-1), Samboan (4-2) ug Barili (3-2). .

(BANAT NEWS)