Lebron nakadaog citizenship award
CEBU, Philippines - Ang bitoon sa Cleveland Cavaliers nga si LeBron James, kinsa wala maapil sa mga nominado pagka-MVP karon nga season, maoy gideklara nga mananaog sa NBA Citizenship Award gumikan sa iyang serbisyo sa komunidad.
Ang maong pasidungog nga gibotohan sa mga piniling sakop sa media, abli sa mga NBA players, coaches ug trainers alang sa maayo nilang buhat gawas sa korte.
Si James, usa ka four-time NBA MVP, gibayaw sa kadungganan ning higayona gumikan sa paghatag niya og oportunidad nga maedukar og sakto ang kapin 1,000 ka mga batan-on nga pinasagdan ug hinikawan sa maayong palad didto sa Akron, Ohio, ang yuta niyang natawhan.
Gawas nga gipundohan ang iyang charity foundation, si James mangunay sab og tudlo sa mga estudyante, iya kining padad-an og suwat ug tawgan ug ingon man gantihan ang ilang nakab-ot pinaagi sa paghatag kanila og mga tiket sa duwa sa Cavs.
Dugang sa iyang kaayo, si James mag-grocery sab kanunay sa mga kabus niyang estudyante ug sa ilang pamilya, palitan kini niya og uniporme ug usahay mopahigayon og outing aron mahatagan og manindot ug bag-o nga kasinatian ang mga bata nga pulos nanimpad sa katilingban. (BANAT NEWS)
- Latest
- Trending