Nakalabok pa

CEBU, Philippines - Nasugamak man tuod sila sa miaging duha ka duwa, apan gipakita sa Boston Celtics nga duna pud sila’y ikasukol batok sa defending champion Cleveland Cavaliers.

Ug ila kining nahimo bisan og wala ang  alas nilang si Isaiah Thomas  nga dili na makaduwa pa gumikan sa injury sa iyang bat-ang.

Si Avery Bradley milansang og krusyal nga   tres  dayong  kapupos sa oras aron pag-agak sa   Celtics ngadto sa 111-108 nilang pagresbak ngadto sa Cavaliers  sa  Game-3  sa “best-of-seven” NBA Eastern Conference finals kagahapon  didto  sa Quicken Loans Arena sa Cleveland, Ohio.

“Everybody had to step up their game, especially  with  one of our brothers down,” matud pa ni Marcus Smart nga maoy mihulip sa dapit ni Thomas.

Si Smart miratsada og career-high 27 puntos, samtang si Bradley midugang og 21 puntos alang sa Celtics nga nanghinaut makatabla sa Game-4 nga gikatakda karong Miyerkules.

Daku sab og natabang silang Al Hordford ug Kelly Olynyk nga nagkumboya og 31 puntos alang sa Celtics nga mitusak og 18 ka 3-pointers.

Bisan tuod og sila gihapon maoy naglabaw sa serye, 2-1, daku kining sagpa sa Cavs atubangan sa ilang fans. Gawas nga nakalas  ang  21 puntos nilang labaw, napapas sab ang damgo sa Cleveland  nga  mikulit og     playoff    record   alang sa sagunson nga daog  nga  moabot na unta sa  13,   apil   ang tulo na ka pagpakaging nila sa Golden  State  Warriors sa miaging NBA finals.

Mikubol ang opensa ni James diin mihipos lang siya og 11 puntos human mipasud lamang og upat sa 13 niya ka itsa ug nabokya sa pa katapusang kuwarter gawas nga dunay lima ka turnovers.

Sa pagpamugnaw ni James, si Kyrie Irving mipabuhagay og 29 puntos ug si Kevin Love miposa og 28 puntos ug milangkat og 10 ka rebounds.

Si Tristan Thompson mitali sab og 18 puntos,  apan kining tanan dili  igo sa Cavaliers aron puhalan ang kadasig ug determinasyon sa Celtics nga makabawos.

Misaad hinuon si James nga mamawi sila sa sunod nga duwa ilabi na kay nakaamgo sila kun asang dapit sila huyang. (BANAT NEWS)