Tillor naghari sa Bogo duathlon

CEBU, Philippines – Ang garbo sa dakbayan sa Bogo nga si Noel Tillor midalit og kalipay ug mitunol og dungog sa iyang mga katagilungsod human gidominar ang 5th Bogo Duathlon Challenge kagahapong adlawa.

Gibiyaan og maayo ni Tillor ang iyang mga karibal aron paghuman sa makutas nga lumba sud lamang sa duha ka oras, 36 minutos ug 36 segundos. Bugti niini, iyang nasakmit ang men's open elite title.

Si Sulpicio Ombong maoy mipahiluna sa ikaduhang dapit sa oras nga 2:42:09, samtang si Jezreil Baguio nalandig sa ikatulo sa oras nga 2:43:15.

Ang manghud ni Noel Tillor nga si Argie mitapos ikaduha ni Jimboy Butad sa 30-under age group. Si Butad miposte og oras nga 1:26:05, samtang si Argie nakahuman sa oras nga 1:27:78.

Si Jheppy Joson maoy nanghawod sa 31-44 category sa oras nga 1:28:23 ug gisundan kini nilang Rolly Cabaluna (1:29:28) ug Ramonito Espinosa (1:32:26), samtang ang top three sa 45-above mao sila si Nick Malon (1:34:22), Edilberto Bantiacila  (1:54:12) ug Martin Cacanog (1:55:75).

Sa women’s open, si Lizzane Abella maoy gikoronahang hara sa oras nga 1:56:20. Si Lucille Ruiz mitapos sa ikaduha sa oras nga 1:57:07, samtang si Marjorie Ellen Jore maoy na-3rd human gihuman ang karera sud sa duha ka oras. EBV (BANAT NEWS)