Melindo mi-KO ni Yaegashi sa RD1
CEBU, Philippines – Hingpit nga nausa ni ALA Boxing Gym star Milan 'El Metodico' Melindo ang IBF junior flyweight title human niya gipatukay-ang sa first round ang Hapon nga si Akira Yaegashi sa kaugalingon niining balwarte didto sa Tokyo, Japan kagahapon.
Si Melindo kinsa nangandam sa usa ka lisud nga sangka batok sa kanhi regular champion wa damha nga mopatigbabaw sa kusug batok ni Yaegashi kinsa nailhan sa iyang kalig-on. Sa wala pa niya tapusa sa 2:45 sa opening bell, si Melindo unang mipatumba ni Yaegashi og kaduha human sa sunod-sunod nga kombinasyon.
Sa maong kadaugan si Melindo misaka sa record nga 36-2, 13 KOs, samtang si Yaegashi nakahiagum sa ikaunom niyang pilde sud sa 31 ka professional fights.
Si Melindo kinsa wa mailhi sa iyang knockout power mipatugpa og left hook sa ulo sa Hapon kinsa daling miyaka. Nakarekober si Yaegashi ug isug nga nakigbinayloay ni Melindo, apan igo ra niyang gisawo ang mga kusug nga counter-punches sa ALA boxer.
Nakita ni referee Eddie Hernandez nga sobra na ang kastigo nga gidawat ni Yaegashi rasun nga giundang niya ang away pabor sa Pinoy boxer.
Tam-is kini nga kadaugan ni Melindo kinsa una nahimong interim champion dihang iyang gipilde pinaagi sa unanimous decision ang Thai contender nga si Fahlan Sakkreerin didto sa Cebu Coliseum niadtong Nobiyembre.
Si Melindo nahimong ikaupat nga active world champion sa nasud uban nila ni Manny Pacquiao, Jerwin Ancajas ug stablemate nga si Donnie Nietes. (BANAT NEWS)
- Latest
