Mayweather: Away batok McGregor dako og tsansa mahitabo
CEBU, Philippines – Human sa pipila ka adlaw nga pagpakahilom, mitingog na si Floyd Mayweather Jr. aron ipadayag nga ang gihandum nga away nilang UFC lightweight champion Conor McGregor 90 porsiyento nga mahitabo kun mobalik siya og boksing.
Ang retiradong way pilde nga five-division world champion mi-angkon nga gusto siyang makigsangka ni McGregor sa usa ka away nga kun ugaling mahinayon mokadlit og bag-ong mga records sa boksing kay segurado man nga makadani kini og interes sa mga fans tibuok kalibutan.
Misamot og kabokal ang giluto nilang engkuwentro human ang 28-anyos nga si McGregor mi-aplay na og lisensiya sa boksing didto sa Nevada ug gipirmahan na sab niini ang kontrata aron makigharong ni Mayweather.
Sa iyang habig, si Mayweather nagkanayon nga si McGregor lamang maoy makapabalik niya og boksing.
"If I do fight, there's a 90 percent chance it's against Conor McGregor," dason pa ni Mayweather atol sa usa ka news conference kagahapong adlawa didto sa Copper Box Arena sa London.
"The only fight that makes sense to me is the McGregor fight," dugang pa sa kanhi pound-for-pound king nga miretiro bitbit ang 49-0 record niadtong 2015. "I've accomplished everything else I want to accomplish. Conor McGregor is professional and so am I. He's a stand-up fighter and I'm a stand-up fighter. He kicks ass in the octagon and I kick ass in the boxing ring."
Kun madayon, usa kini ka 'mismatch' alang sa mga kritiko apan si Mayweather mi-insister nga mao unya kini ang labing dako nga away nga nahimo sa boxing ug mixed martial arts. EBV (BANAT NEWS)
- Latest