Usa na lang Warriors gilampurnas na sab ang Spurs, 3-0 na
CEBU, Philippines – Si Kevin Durant mikadlit og 19 sa iyang 33 puntos sa nagbagang rally sa ikatulong kuwarter nga maoy nahimong hagdanan sa Golden State Warriors ngadto sa 120-108 nga demolisyon sa San Antonio Spurs aron pagposte og 3-0 nga bintaha sa ilang best-of-seven NBA Western Conference finals kagahapong adlawa didto sa AT&T Center sa San Antonio, Texas.
Wala pay team nga nakabangon human mapilde sa nag-unang tulo ka duwa sa serye sa kasaysayan sa liga. Posibleng silhigon na sa Warriors ang Spurs sa Game 4 karong Martes didto sa San Antonio.
Ang Spurs igo lamang nakasikit ngadto sa kuwatro puntos, 65-69, sa nakaon nga duha ka minuto sa ikatulong kuwarter gumikan kay si Durant, nga milangkat sab og 10 ka rebounds, kalit nga nanginit aron pasiugdahan ang bangis nga opensiba sa warriors nga nakapaminghoy sa 18,700 ka fans sa San Antonio.
Ang Spurs miduwa nga napuno sa emosyon apan wala kini mosaler sa bagsik nga puwersa sa Warriors.
Wala nang daan sila si Tony Parker ug Kawhie Leonard, daw sa gisungog gyud sa panahon ang Spurs gumikan kay si David Lee na-angol sab sa nahibilin nga dos minutos sa unang kuwarter.
Si Stephen Curry midugang og 21 puntos ug si Klay Thompson mi-iskor og 17 alang sa Warriors, nga 11-0 na karon sa post-season aron tablahon ang record alang sa labing nindot nga sinugdanan sa kasaysayan sa NBA playoffs. Midaog sab sila og 26 sa katapusan nilang 27 ka duwa timaan sa dili hitupngan nilang kainit.
Si Manu Ginobili maoy nangu sa Spurs uban sa iyang 21 puntos, samtang si LaMarcus Aldridge mihipos og 18 puntos apan nakapasud lamang og pito sa 17 niini ka itsa. (BANAT NEWS)
- Latest
