Melindo moaway na ‘sab alang sa World Title

CEBU, Philippines - Sa ikatulong higayon, si Milan ‘El Metodico’ Melindo (35-2, 12KOs) mosuway na sab pagkab-ot sa iyang damgo nga mamahimong usa ka world champion.

Determinado kaayo siya, apan usa ka  lisud nga tahas ang iyang sagubangon kay iyang hagiton mao man si defending Japanese champion Akira Yaegashi alang sa International Boxing Federation (IBF) light flyweight belt karong gabii didto sa Ariake Coliseum sa Tokyo, Japan.

Ang pambato sa ALA Boxing Gym napakyas sa una niyang pagsuway human mapilde pinaagi sa unanimous decision ni

WBO/WBA flyweight champion Juan Francisco Estrada sa Mexico niadtong 2013 didto sa Macau. Sa ikaduhang higayon nasugamak si Melindo, apan ning puntoha pinaagi sa kontrobersiyal nga technical decision batok sa Mehikanong si Javier Mendoza duha ka tuig ang milabay.

Apan gilubong na sa kalimot ni Melindo ang maong mapait niyang mga kaparotan.

Pursigido nga matuman ang iyang pangandoy, ang 29-anyos nga si Melindo hinay-hinay nga misaka og balik  uban ang tumang kadasig ug paglaum.

Timaan niana, mihaw-as siya gikan sa tulo ka sunod-sunod nga daog, ang labing uwahi pinaagi sa desisyon batok ni Thai Sakkrerein Jr. aron pagsakmit sa interim IBF 108-pound title nga maoy nakahatag kaniya og katungod nga hagiton si Yaegashi (25-5, 13KOs) nga modepensa sa ikatulong higayon sa bakus nga iyang nailog gikan ni Mendoza niadtong Disyembre 2015.

Usa ka bug-at nga misyon ang makigsangka batok sa reigning, two-division world champion sa teritoryo niini, apan si Melindo andam nga moatubang sa bisan unsang hagit.

“To all my boxing fans, I will show a good fight. I will teach you what boxing is. This fight is not only for myself but for those who believe in me to win this fight for our country. Let’s fight together by your support and prayers. Laban Pilipinas!” matud pa ni Melindo.

Angayan lamang nga mao kini ang buhaton ni Melindo gumikan kay lagmit mao na kini ang katapusang higayon nga siya makaaway og world title kun ugaling mahisukamod siya sa ikatulong higayon. (BANAT NEWS)