Wa’y kaluoy Cavaliers milubog sa Celtics og 44 punots, 2-0 na
CEBU, Philippines - Wala’y kukaluoy nga gilubong sa defending champion Cleveland Cavaliers ang host Boston Celtics, 130-86 aron paglansang og 2-0 nga bentaha sa ilang ‘best-of-seven’ NBA Eastern Conference finals kagahapon didto sa TD Garden sa Boston, Massachusetts.
Si LeBron James padayong miratsada human kini mipuntos og 30 aron pangulohan ang demolisyon ngadto sa Boston.
Sa lain na sab nga eksplosibo niyang duwa, si James mipatuasik og 22 puntos sa nag-unang duha ka kuwarter aron hatagan ang Cavs og 41 puntos nga bentaha, 72-31 nga maoy labing daku nga labaw sa halftime sa kasaysayan sa NBA playoffs.
Mao sab kadto ang labing daku nga daog sa playoff alang sa Cavaliers nga lagmit silhigon ang Celtics gumikan kay sila na man maoy mo-host sa sunod nga duha ka duwa sa serye didto sa Cleveland.
Sa ikaduhang sunod-sunod nga higayon, nasamdan ang dughan sa Celtics human makasinati sa labing bati nga pilde sa playoff didto sa ilang tugkaran sa kasaysayan sa ilang prangkisa.
Si James mipasa sab og pito ka assists, upat ka rebounds, upat ka steals ug tulo ka blocks, si Kevin Love dunay 21 puntos ug 12 ka rebounds, samtang si Kyrie Irving mitali og 23 puntos alang sa Cavs nga mirehistro og 10-0 record sa playoffs sud sa duha ka sunod-sunod nga season. Mao sab kadto ang ika-13 nilang sagunsong daog sa playoffs, apil na ang katapusan nilang tulo ka duwa sa miaging tuig diin ilang gipakugangan ang Golden State Warriors dayon na ngadto sa pagsakmit sa labing una nilang kampiyonato.
Si Celtics guard Avery Bradley nasagmuyo sa gihimong paglampaso kanila sa Cavs atubangan sa bagang panon sa ilang fans. Nasamotan pa ang kalbaryo sa Celtics human si Isaiah Thomas miduwa kutob lamang sa halftime human ma-injured ang tuo niyang hawak.
Ang Game-3 gikatakda karong Lunes didto sa Cleveland. (BANAT NEWS)
- Latest