Spurs mibahad moresbak sa Warriors
CEBU, Philippines - Bisan og wala pa’y klaro kun makaduwa na ba og balik ang injured nilang star forward nga si Kawhi Leonard, ang San Antonio Spurs mibahad nga mobawos batok sa karibal nilang Golden State Warriors.
Ubos sa liderato nilang Stephen Curry ug Kevin Durant, ang Warriors nagbitbit karon og 2-0 nga bentaha sa ilang best-of-seven NBA Western Conference finals, apan angayan sila nga mangandam alang sa usa ka dakung gubat sa Game-3 ugmang adlawa didto sa AT&T Center sa San Antonio Texas.
“You’ve got to be the aggressor. You’ve got to be sharp for 48 minutes and you’ve got to take it to them,” matud pa sa sentro sa Spurs nga si Pau Gasol.
Nakapanimaho na unta og daog ang Spurs sa Game-1 human sila milabaw og 25 puntos, apan nausab ang timplada sa ilang duwa human na-injured si Leonard sa ikatulong kuwarter nga miresulta ngadto sa ilang paghagba, 113-111.
Kay wala si Leonard nga nakapasamot sa kalbaryo sa San Antonio human sab ma-injured si Tony Parker, gipahimuslan sa Warriors ang kahigayonan aron paglatos sa Spurs sa Game-2, 136-100.
Gihulagway ni Gasol ang ilang koponan nga usa ka samdan nga mananap ug naglungot-lungot kining makabawos sa Warriors.
Human sa makapadismaya niyang performance sa miagi nilang duwa, si LaMarcus Aldridge mipasalig nga mohimo og impresiyon sa Spurs ning higayona. (BANAT NEWS)
- Latest
