Banat ( Leaderboard Top ), pagematch: 1, sectionmatch: 1

LeBron, Harden nangu sa All-NBA team

CEBU, Philippines - Si LeBron James sa Cleveland Cavaliers ug si James Harden sa Houston Rockets maoy nangu sa All-NBA First Team nga gianunsiyo sa liga kagahapong adlawa.

Gumikan niini, natupngan ni James ang rekord nilang Kobe Bryant ug Karl Malone uban sa ika-11 niyang pagkaapil sa maong halangdon nga grupo, samtang si Harden nabalik sa listahan human matagak sa miaging tuig bisan pa man   sa   impresibong mga numero  nga  iyang natali.

Si James dunay average nga 26.4 points, 8.7 assists ug 8.6 rebounds matag duwa, samtang si Harden mi-average og 29.1 puntos, 11.2 assists ug 8.1 rebounds matag duwa karon nga season.

Nagkompleto sa First Team mao sila si Russell Westbrook sa Oklahoma City Thunder, Kawhi Leonard sa San Antonio Spurs ug Anthony Davis sa New Orleans Pelicans.

Wala’y naapil bisan usa ka bitoon sa Golden State Warriors sa first team. Sila si Stephen Curry ug Kevin Durant nalabog sa All-NBA Second Team uban nilang Giannis Antetokounmpo sa Milwaukee Bucks, Isaiah Thomas sa Boston Celtics ug Rudy Gobert sa Utah Jazz.

Ang All-NBA Third Team naglangkob nilang Jimmy Butler sa Chicago Bulls, Draymond Green sa Golden State Warriors, DeAndre Jordan sa LA Clippers, DeMar DeRozan sa Toronto Raptors ug John Wall sa Washington Wizards. (BANAT NEWS)

  • Follow Us: