Believe & Inspire, Geobert daog dayon sa Vendredi Summer League

CEBU, Philippines - Daog maoy misugat  sa Believe & Inspire ug Geobert Merchandise pagsugod sa Vendredi Summer  League 2017 niadtong Lunes sa gabii didto sa Barangay Lamac gym sa Consolacion.

Ang Believe & Inspire midaog batok sa Laura’s sa iskor nga 87-80, samtang ang Geobert Merchandise mipukan sa Carkienna Restaurant, 90-81.

Upat ka players sa Believe & Inspire ang mirehistro og double figures sa pagpangulo  sa ilang team manager nga si Mike Maglasang, kinsa mikulit og 20 puntos.

Laing mihimo’g double digits mao si Francis Torralba sa iyang 19 puntos, gisundan nilang Ailo Alberca ug Serge Sanchez sa ilang 13 ug 12 puntos matag usa.

Ang   Laura’s   Store   ni Laura Tibon gipangulohan ni Saitama Palang pinaagi sa iyang 16 puntos, si Marc Gold Capao mihirit og 13 puntos, samtang sila si Jarred Monsanto ug Ian Karl nagtampohay og 10 puntos.

Sa laing bahin, kulba kaayong nakaduwa si Jay Agbay  aron pangulohan ang Geobert Merchandise pinaagi sa iyang 25 puntos. Ang club president nga si Gary Rojas miamot og 14 puntos, si Gary Alisoso miambit og 13 puntos ug si Archie Abrasado mitimbre’g 10 puntos sa Geobert Merchandise ni Nonoy Sajot.

Nausik ang 28 puntos ni Bing Abrasado kay nasugamak ang Carkienna ni Bryan Burlaos.

Si Barry Sasing miariya og 19 puntos, samtang sila si Yanskee Capao ug Sherby Shane nagkumbinar og 24 puntos sa napildeng koponan.

Ang mga duwa gipadagan ni league commissioner Magen Dave Tibonn Pernito.

Puntos matag usa

Unang duwa:

Believe & Inspire (87) – Maglasang 20, Torralba 19, Alberca 13, Sanchez 12, Sinadjan 9, Congson 6, Valle 6, Burlaos 2.

Laura’s Store (80) – Palang 16, Capao 13, J. Monsanto 10, Ian Karl 10, Siatilo 9, R. Monsanto 8, Pernito 8, C. Monsanto 6.

Ikaduhang duwa:

Geobert (90) – Agbay 25, Rojas 14, Alisoso 13, Abrasado 10, Sanchez 8, Manayon 7, Sajot 7, Pitogo 4, J-Boy 2.

Carkienna (81) – Abrasado 28, Sasing 19, Capao 13, Shane 11, Jayme 7, Montes 3. (BANAT NEWS)