Nabanhaw nga hulga
Ang duguong engkuwentro sa hinugpong nga puwersa sa kapolisan ug kasundalohan batok sa armadong pundok sa Sitio Ylaya sa Barangay Napo sa lungsod sa Inabanga sa atong silingang lalawigan sa Bohol wa lang modason sa pasidaan sa Estados Unidos ug ubang kanasuran sa presensiya sa mga terorista dinhi sa Central Visayas apan nipahinumdom sa tanang hingtungdan nga di hingpit nga luwas ang Kabisay-an gikan sa hulga sa pagpanagit sa mga bandido sa Mindanao.
Nga nahitabo na gatosan ka katuigan ang nilabay atol sa mga buwan sa habagat gikan sa Hunyo ngadto sa Oktubre matag tuig. Dihang ang atong katiguwangan sa Sugbo ug Bohol nabiktima sa pagpangronda sa mga pirata gikan sa Mindanao.
***
Tungod sa kalapad ug kalisod panalipdan sa kabaybayonan sa Sugbo ug Bohol, ang mga Sugbuanon ug mga Bol-anon apil sa kinaham nga puntirya sa mga ronda sa mga pirata. Nga nagpatuyang lang sa pagpanguha sa mga bulawan ug ubang mahalong kabtangan.
Way kalainan sa gihimo sa Abu Sayyaf Group ug ubang mga bandido sa Mindanao. Gidagit sab sa ilang katiguwangan niadto ang mga paring Katsila ug kababayen-an sa Sugbo ug Bohol nga ilang gipalukat og dugang mga bulawan ug katigayonan.
***
Ang karaang krisis nakapatumaw sa batan-ong bayani. Si Padre Julian Bermejo, 25, nipalig-on sa mga simbahan, nitukod sa mga baluarte ug nipatuman og mga kontra senyas sa mga lingganay ug mga su' aron nga bisan layo pang mga pirata makatago nang kababayen-an ug kabataan sa mga simbahan ug makaandam na sa gubat ang kalalakin-an.
Gipangulohan ni Padre Bermejo ang pagpukan sa mga pirata sa makasaysayanong gubat sa Sumilon niadtong 1813. Labihan kamalampuson sa mga Sugbuanon ug mga Bol-anon nga wa na mobalik ang mga pirata hangtod nga namatay si Bermejo niadtong 1851.
***
Mas mabinantayon nang Sugbo ug Bohol sa lab-as nga hulga sa mga bandido. Nabantayan nang daan ang ilang pagsud sa habagatang Sugbo sa niaging tuig ug nasigpatan dayon sila sa pagdunggo sa Inabanga niadtong Lunes.
Nangangkon og kadaogan ang kasundalohan ug kapolisan tungod sa kamabinantayon sa mga sibilyan. Ambot kon sama sa kadaogan ni Padre Bermejo 200 ka tuig nang nilabay igo na bang makapatagam sa mga bandido.
- Latest
