3 ‘tirador’ ng side mirror, timbog

MANILA, Philippines -  Dinakip ng mga tauhan ng Quezon City Police District-Galas Station  ang tatlong katao makaraang masamsaman ng dalawang sako ng ibat- ibang uri ng side mirror ng mga sasakyan sa isinagawang operasyon ng mga pulis sa kahabaan ng Banawe, Brgy. Tatalon sa lungsod.

Kinilala ang mga nadakip na suspek na sina  Roel Suicon, 27, Mark Teologo, 36, at Gerald Abaja, 36.

Ayon kay Supt. Christian dela Cruz ng Galas Police,  ang tatlo ay   naaktuhan ng mga tauhan na  nagnanakaw ng mga side mirror sa mga nakaparadang mga sasakyan sa kahabaan ng Banawe Street, Brgy. Tatalon Quezon City.

Anya,  naglunsad sila ng operasyon laban sa mga kawatan na nagnanakaw ng mga side mirror sa lugar makaraang makatanggap ng tip mula sa isang concerned citizen hinggil sa ginagawang modus operandi ng tatlong naarestong kalalakihan.

Bukod sa dalawang sako ng nakaw na  side mirror ay   nakuhanan pa ang mga ito ng 3 sachet ng hinihinalang shabu.

Ang tatlo na nakapiit na sa Galas Police Station at nakatakdang sampahan ng kaukulang kaso.