2 magsasaka nagduwelo: 1 todas

LEGAZPI CITY, Albay , Philippines  - Kamatayan ang sinapit ng isang magsasaka nang pagtatagain ng kapwa magsasaka na hinamon niya nang duwelo sa Sitio Cambilaga, Brgy. Lagta,  Baleno, Masbate kamakalawa ng gabi. Agad na namatay dahil sa rami nang taga na inabot ng kanyang katawan ang biktimang si Dominador Rapsing, 40 anyos, ng Brgy. Cagpandan habang sumuko naman sa rumespondeng mga barangay tanod ang suspek na si Gaspar Drio, 33 anyos, ng Brgy. Lagta sa naturang bayan. Sa ulat, dakong alas-9:00 ng gabi, sinugod ng lasing na biktima ang suspek sa bahay nito at nanghamon ng duwelo habang nakabunot ang isang kamay sa dala nitong sling bag. Umiwas naman umano ang suspek sa paghahamon ng biktima pero hindi siya tinigilan sa pangungulit na magduwelo sila kaya’t kumuha na siya ng itak at pinagtataga ang biktima na agad nitong ikinamatay.