Maestro patay sa aksidente

CEBU, Philippines - Patay ang usa ka magtutudlo human ang gisakyan niya nga motorsiklo nagkabanggaanay sa laing motorsiklo didto sa national highway sa Barangay Lamacan, Argao kaniadtong Biyernes sa gabii.

Si PO3 Bobby Nasis sa Argao Police Station miila sa namatay nga mao si Jaque Jun Guevarra, 36, minyo ug taga Barangay Talaga, Argao. Si Guevarra magtutudlo sa Argao National High School.

Ang drayber sa laing motorsiklo nga gikabangga sa maestro mao si Eugene Calisan, 26, taga Barangay Canbanua, Argao. Matud sa kapolisan nga ang duha ka drayber wala magsul-ob og crash helmet ug ang pasaherong nakasinati og mga samad ug bun-og sa ilang kalawasan.

Si PO3 Nasis miingon nga ang magtutudlo dali nga gidala sa Isidro Kintanar Memorial Hospital sa Argao, apan gibalhin kini sa usa ka tambalanan sa dakbayan sa Sugbo. Bisan pa niini, wala na gyud maluwas pa ang magtutudlo.

Matud ni PO3 Nasis nga padulong na mopauli ang magtutudlo sa ilang panimalay gikan sa tunghaan nga iyang gialagaran dihang nahitabo ang aksidente. Sa imbestigasyon nasayran nga si Guevarra misuway sa pag-overtake sa usa ka tricycle apan nagkabangga sila ug ang motorsiklo nga gimaneho ni Calisan. Tungod sa kusog nga impak sa panagbangga, ang duha ka drayber nalampurnas sa karsada ug nakaangkon og daghang samad ug bun-og.

Ang kapolisan nagpahinumdom gyud sa mga momaneho ug sa mga mosakay og motorsiklo nga magsul-ob gyud og crash helmet aron nga kun maaksidente dili magrabehan ang ilang ulo. - /RUB) (BANAT NEWS)