Transport strike ugma

CEBU, Philippines - Ang mga drayber og PUJ nga sakop sa Pinagkakaisang Samahan ng mga Tsuper at Operators Nationwide (Piston) padayong nag-awhag sa ilang kaubanang drayber nga ubanan sila sa ilusad nilang transport strike ugmang adlawa.

Si Greg Perez nga maoy Piston-Cebu coordinator, mipahibalo nga ang 700 ka sakop sa ilang kahugpongan dinhi sa lainlaing dapit sa Sugbo mosalmot sa transport strike nga ilang sugdan alas tres pa sa kaadlawon ug taposon inigka hapon ugma. Ang mga sakop sa Piston nagpahigayon og rikorida pinaagi sa pagsuroy sa lainlaing dapit, ilabi na sa Mandaue City, ug gamit ang amplifier gipahibalo nila ang katawhan sa ilang pagahimoon nga protesta.

Padayong giagni nila ni Perez ang ubang drayber og PUJ nga mohunong usa sa pagpamasahero ugma, aron sa pagpakita sa hugot nila nga pagprotesta sa lakang sa kagamhanan nga wad-on na ang mga PUJ nga kapin na sa 15 ka tuig.

Gawas sa mga PUJ, adunay mga drayber og tricycle nga nagbiyahe usab sa nagkadaiyang barangay sa Mandaue nga mipadayag og kaandam pagsalmot sa  pagpahigayon og welga isip pagpakita sa ilang simpatiya. Ang kagamhanan nagtinguha nga dili na tugotan nga makapamasahero ang mga PUJ nga kapin na sa 15 ka tuig kay sagad niini mga gubaon na ug makapasakripisyo lang kini sa mga pasahero.

Apan ang mga sakop sa Piston, ug bisan na ang ubang tag-iya og PUJ, wala makagusto niining maong lakang sa kagamhanan. Ilang gipasabot nga daghang PUJ nga kapin na sa 15 ka tuig nga nag-operate apan giatiman sa ilang mga tag-iya. Giangkon hinoon sa kadagkoan sa Piston nga duna gyuy mga PUJ nga mahulagway nga gubaon na bisan og wala pa kini makaabot og 15 ka tuig. Matud nila nga kini maoy angayang dili na tugotan nga makabiyahe.

Tungod sa plano sa mga PUJ drivers nga magwelga ugmang adlawa, ang mga opisyal sa Mandaue ug Dakbayan sa Sugbo nangandam na daan. Ang mga sakyanan nga gipanag-iya sa Mandaue ug Dakbayan sa Sugbo padaganon aron paghakot kun adunay mga ma-stranded.

Matud ni Mayor Tomas Osmeña nga padaganon niya ang tanang Kaoshiung ug Yokohama buses, ingon man ang ubang sakyanan sa City Hall, kun gikinahanglan aron maalagaran ang mga tawo nga masakripisyo sa welga.

Apan ang kadagkoan sa Land Transportation Franchising and Regulatory Board (LTFRB) mipahinumdom gyud sa mga drayber nga mosalmot sa protesta nga supak sa balaod ang pagpahigayon og welga.

Gipahinumdoman ni LTFRB-7 Regional Director Ahmed Cuizon ang mga tag-iya sa PUJ nga mahimong mag-atubang sila og problema kun mosalmot sila sa welga, apan daan na nga nipasabot ang mga PUJ operator nga samtang gusto sila nga mobiyahe ang ilang sakyanan, apan wala sila’y drayber. (BANAT NEWS)